#تقرير_جطو يفضح المستور
موقع القانون فابور يرحب بكم
يا خويا كنا جالسين و على غفلا وقف علينا دريس جطو بالتقرير السنوي ديال المجلس الأعلى للحسابات، شنو غادي نقول ليكم! حق الرب إلى كوسطا ياوطن تقرير أسود بمعنى الكلمة، و أنا مزال الدماغ ديالي مامتيقش هاد الواقعة حيث هادي أول مرة قطاع حكومي كيمسح المكياج من وجه القطاعات الحكومية الأخرى ، وا الفرشة بالعلالي أمونامي تبع معايا تفهم.
كل سنة كيقدم دريس جطو بصفتو رئيس المجلس الأعلى للحسابات تقرير سنوي فيه حصيلة ديال أنشطة المحاكم المالية و خصوصا المتعلقة بتسيير الأجهزة المحلية و الوطنية، التقرير كيتقدم للملك و لرئيس الحكومة و رئيس مجلس النواب و رئيس مجلس المستشارين ، هاد التقرير ديال هاد العام خرج ليها طاي طاي، بحيث كشف المستور و فضح الإختلالات و نهب المال العام.
أول واحد عراه جطو هو الباترون أخنوش ، بحيث كشف التقرير على إختلالات كارثية فوزارة الفلاحة و الصيد البحري، و من بينها العشوائية ديال مخطط المغرب الأخضر لي غادي غير بالزهر و بركة الواليدين ، حيث المخطط كيفتقر لأي تصور لتدبير المخاطر يعني مكينش Plan B ، زيد عليها الإختلالات و سوء الحكامة و التدبير فبعض المشاريع لي تصرفات عليها الملايين و كان مصيرها الفشل بدون أي نتيجة تذكر ، بالإضافة لمشروع أليوتيس لي ماقدم حتى شي فائدة تدكر من غير الميزانية الهائلة لي تصرفات.
التقرير أيضا فرش وزارة التجهيز و الإختلالات الكبرى لي كتعوم فيها ، و الفضيحة المدوية هي فاش شرات الوزارة 50 usb ديال 32 جيغا ب 720 درهم للوحدة و هو مافايتش حتى 150 درهم فالسوق، بلا ماندكرو imprimante آلة طابعة لي تشرات ب 16000 درهم و هي ماساوية حتى 2000 درهم.
فضيحة أخرى تسجلات فمجلس جهة كلميم واد نون ، بحيث المعنيين بالأمر فجماعة الشاطئ الأبيض صرفو الله يكثر خيرهم 55 مليون سنتيم على وليمة غداء بحال إلى مغديين كاع ساكنة الجهة ، و للإشارة فقط هاد الجماعة ديال الشاطئ الأبيض هي منطقة قروية شبه خالية من السكان بحال الثلث الخالي يعني راه واضح فين مشات 55 مليون سنتيم.
التقرير الأسود فضح العديد من الإختلالات فالوزارات و المجالس الترابية، يعني سوء تدبير المال العام بالعلالي و هادشي كيستدعي تطبيق مبدأ ربط المسؤولية بالمحاسبة ، حيث حرام هاد الفلوس تضيع بدون نتائج تدكر، لمهم هادشي لي قلنا غير شوية من داك العرام ديال الفضايح لي جات فتقرير جطو، لي بغا يقرا التعليق كامل يدخل للموقع ديال المجلس الأعلى للحسابات
موقع القانون فابور يشركم على الزيارة
ليست هناك تعليقات:
إرسال تعليق